Hundahald

Hundar eru mjög vinsæl gæludýr hér allt í kringum okkur. Stundum mæti ég fólki með tvo eða þrjá hunda á gönguferð. Einhverjir gætu verið að passa hunda fyrir aðra en sumir eiga greinilega marga hunda. Í húsinu okkar eru tveir hundar. Annar minnir á íslenska hundinn, heitir Willie og er ákaflega vel vaninn og hlýðir húsbændum sínum. Hinn er lítill bolabítur, óttalegur kjáni, geltir í tíma og ótíma og eigandinn ræður ekkert við hann. Þessi hundur er kallaður Mr. Big! Ég reyni að sýna hundum nágrannanna tilhlýðilegan áhuga. Það er þó hvorki af innri þörf eða hvatningu sem ég kjái framan í hundana. Nei, það er í þeirri von að mér veitist ytri umbun! Ef ég dáist að hundunum og kjassa þá verða nágrannarnir glaðir og taka mér vel. Eða þannig!